محدش فاهم حاجة

من بعد ما غار كابوس دولة مبارك و اللى كانت اخر عشر سنين بامتياز دولة  رجال الاعمال الحرامية الكبار اللى كانوا سارقين قوت الشعب و محتكرين كل السلع و منكدين علينا عيشة اللى جابونا و مش حاسين بمعاناة الشعب المصري الفقير و قلنا كلنا خلاص الفرج هييجى و هنغرق في النعيم  و العيشة هتبقي لوز .

بس الحقيقة انا بقالى فترة كبيرة بدور على اسباب الانهيار الاقتصادى و الارتفاع المستمر في الاسعار و ضياع الاحتياطى النقدى و هروب رؤوس الاموال و مش لاقي و لا امارة على اى تحسن من بعد الثورة لحد النهاردة ، و خصوصا انى عندى اسئلة كتيرة اوى بصفتى واحد من اللى مش فاهمين لا في الاقتصاد و لا في البورصة و لا القروض  و لا صندوق النقد و نفسي حد من المسئولين يجاوبنى .

مش كانوا بيقولولنا ان ايام مبارك البلد كانت بتتسرق منه هو و عياله و رجال اعماله و بما ان مبارك مشي و اتنحى و اتحاكم و اتسجن و بالمناسبة كان ايامه البنزين متوفر و الغاز متوفر و الكهربا مكانتش بتقطع و الاسعار مبتغلاش بالتوحش ده !! ، هو مش السرقة وقفت و لا ايه  ؟ هى المليارات اللى اتوفرت من السرقة اللى وقفت في السنتين دول فين ؟ و لا المليارات الكتيرة اللى كان سارقها الوحش و قالوا هيرجعوها و تتوزع علينا راحت فين ؟  ، هو مش دخل قناة السويس خلاص بقا للشعب و معتش مخصص لرئاسة الجمهورية زى ايام الشياطين الحرامية ؟ .

هو مش دخل البترول للشعب ؟ و مش منجم السكرى بيجيب فلوس كتير و دهب  و ياقوت و مرجان و لؤلؤ احمدك يا رب و كده ؟ .

طيب ادينا الحمد لله خلصنا من كابوس الحكم العسكرى اللى كان كله من رجالة مبارك اللى كانوا متعودين على سرقة البلد زيه و الحمد لله جالنا ناس نضاف بتوع ربنا ملهومش في السرقة خالص و كمان اصحاب فكر اقتصادى شاطر و بديع و عندهم مشروع لنهضة البلد و حد ادنى و اقصى للاجور و رئيسهم معاه ف جيبه 200 مليار جنيه هيغرقنا بيهم اول ما يتولى السلطة و ابقي سلملى ع الترماى ف محطة النهضة 

( من مذكرات  احد المخدوعين من عاصرى الليمون  )