ابو شرعية حمرا

و رحلت غير مأسوف عليك يا ابو شرعية حمرا

عن سي السيد محمد مرسي اتحدث ، عن مندوب جماعة الاخوان المسلمين المحظورة اتحدث ، عن الراجل اللى ارتكب كل الموبقات في السلطة في سنة واحدة و لما قالنا في خطابه ما قبل الاخير مش سنة كفاية انا قلت بصراحة لا يا مرسي سنة كتيييير اوووووى عليك و مصر كبيرة اوى عليك انت و جماعتك الفاشية العنصرية الدموية .

سيادة المخلوع بالاصالة عن نفسي و بالنيابة عن الملايين من عاصري الليمون شكرا جزيلا كثيرا لحد بعد بكرة يا كبير ، شكرا لانك بجد عملت لشعب مصر خدمات جليلة كتيرة جدا ، اولها انك يا باشا فهمتنا يعنى ايه تيار اسلامى جهادى و يعنى ايه اتباع فكر سيد قطب  من القطبيين و كمان عرفتنا حجمهم في المجتمع و قدراتهم و خرجت اللى شبهك من اهلك و عشيرتك من السجون عشان تخوفنا بيهم و تخليهم يملوا علينا الدنيا تهديد و وعيد .

و شكرا على مجهودك الفظيع انت و جماعتك المحظورة عشان تظهروا على حقيقتكم و تخلونا نعرف ليه الزعيم عبد الناصر و الزعيم السادات و المخلوع مبارك كانوا رامينكم في السجون و محرجين عليكم السياسة و انتم نفسكم مكنتوش بتوع ثورة و لا دعاة ثورة زى ما قلت بلسانك انت شخصيا يا برنس و اثبتم لينا انهم جميعا كانوا محقين و خصوصا عبد الناصر و ما ادراك ما الستينات .

اما بقا يا باشا عن تانى انجاز عظيم و معجز ان حضرتك دخلت شعب مصر موسوعة جينيس بارقام قياسية فظيعة اولها اننا اول شعب عمل ثورة لها عدة موجات في خلال سنتين و نصف ازاحت رئيسين الموجة الاولى منها ازاحت رئيس كان يبدو ان مرجعيته ليبرالية و الموجة الاخيرة او التى نتمنى ان تكون الاخيرة الناجحة ازاحت رئيس مرجعيته اسلامية جهادية و هو الثورة الاولى التى تنجح في ازاحة نظام اسلامى و الرقم القياسي التانى ان يوم 30 يونيو نزل فيه حسب تقديرات القنوات الاخبارية العالمية ما يزيد على 30 مليون مصري .

 يا من اطلقت على نفسك مرشح الثورة و انت و جماعتك اول من تآمر على الثورة ، يا من كنتم اول من ترك الميدان بعد ان سجل نفسه اخر الحاضرين ، يا من جلستم و تفاوضتم مع نائب الرئيس المخلوع لفض الميدان ليخرجوا هم باقل الخسائر و تخرجوا انتم باكبر المكاسب ، اسمع بقا انكم ما عبرتم الى مجلس الشعب المنحل الا على اجساد و دماء الثوار في مناسبات عديدة تشدقتم فيها بحب الوطن و الحفاظ على مكتسبات الثورة و كنتم في مجلسكم البغيض اكثر من اهان الثورة و اول من صوت و اقترع على ان الشرعية لم تعد للميدان ، و سكنتم في مساكن الذين ظلموا ثم تبدل بكم الحال لتخرجوا و تهتفوا ضد حلفائكم من العسكر و تتهموهم بالانقلاب على الشرعية.

سيادة المخلوع ها هو الشعب يستدعى قواته المسلحة و يامرها بالتدخل لعزلك و ها انت تستطيع ان تحقق مصالحة تاريخية بين الشعب و شرطة الشعب و رحلت غير مأسوف عليك يا ابو شرعية حمرا .